काठमाडौं  । 8848  इन्टरटेनमेन्ट प्रालिको प्रस्तुति तथा धिमाल फिल्मस्को निर्माणमा बन्न लागेको नेपाली कथानक चलचित्र सानीमायाको शुभमुहुर्त गरिएको छ ।

बुधबार बिहान नेपाल चलचित्र विकास वोर्डका पूर्व अध्यक्ष राजकुमार राईले शुभमुहुर्त गरेका हुन् । यस कार्यक्रममा बोल्दै राईले चलचित्र बनाउनु ठुलो कुरा नभएको तर राम्रो चलचित्र बनाउनु चुनौतीपूर्ण रहेको बताए । नेपाली चलचित्रको अवस्था नाजुक बन्दै गएको अवस्थामा सानीमाया फिल्मले चलचित्र क्षेत्रमा एक ईट्टा थप्ने विश्वास ब्यक्त गरे । कार्यक्रममा बोल्दै फिल्मका लेखक एवम् निर्देशक देव धिमालले फिल्ममा धेरै कलाकारहरु नयाँ अनुहार भएको र नयाँ अनुहारले पनि गर्न सक्छन् भन्ने उदाहरण यो सानीमाया चलचित्रबाट देखिने कुरामा विश्वास ब्यक्त गरे ।

राज चौधरी निर्माता रहेको यस चलचित्रमा रामचन्द्र अधिकारी ,शारदा गिरि ,सावित्रा चिलवाल ,राजकुमार शाह ,अर्जुन थापा ,स्वयच्छा ढकाल ,प्रियंका श्रेष्ठ,अभिषेक फुयाल,कृष्णप्रसाद धिताल लगायतका कलाकारको अभिनय रहने छ । जेष्ठको दोस्रो हप्ताबाट शुटिङ हुने निर्माण पक्षले जनाएको छ ।