काठमाडौं । नेपाली कांग्रेसका चर्चित युवा नेता गगन थापाले निर्वाचनमा कांग्रेसले कसैसँग गठबन्धन नगर्ने बताएका छन्।
काठमाडौं महानगरपालिकाको कांग्रेस अधिवेशन उद्घाटन समारोहलाई सम्बोधन गर्दै नेता थापाले यस्तो बताएका हुन् । उनले भने, ‘कांग्रेसले आगामी निर्वाचनमा कसैसँग गठबन्धन गर्दैन। कांग्रेस एक्लै चुनावमा जाँदा पनि बहुमत ल्याउँछ।’
नेता थापाले भने, ‘हामी कसैसँग मिलेर चुनावमा जाने होइन। कम्युनिष्ट, मधेसवादी वा राप्रपा कसैसँग मिल्ने होइन। उनीहरू मिले पनि जित्न सक्छौँ। त्यसको लागि हामीले पनि ध्यान दिएर लाग्नुपर्छ।’
आफ्नै पार्टीको सरकार ढालेर नेपाली कांग्रेसलाई सत्तामा लाने माधव नेपालले अहिलेको सत्ता गठबन्धन चुनावमा पनि मिलेर जाने र एमालेलाई जसरी पनि धुलो चटाउने बताइरहेका बेला कांग्रेसका प्रभावशाली नेताको यस्तो भनाइले उनको सपना चकनाचुर हुने छ होइन भन्ने प्रश्न उब्जिएको छ ।
