काठमाडौं । नेपाली कांग्रेसका नेता डाक्टर शेखर कोइरालाले निर्वाचनमा आफ्नो पार्टीका नेता कार्यकर्ता सबै एक ढिक्का भएर अगाडि बढेमा अन्य दलसँग गठबन्धन गर्नै नपर्ने जिकिर गरेका छन् ।
उनले मंगलबार विराटनगरमा नेपाली कांग्रेसको चुनावी गीत सार्वजनिक गर्ने कार्यक्रममा बोल्दै यस्तो उल्लेख गरेका हुन् । नेता कोइरालाले कांग्रेसमा अहिले आन्तरिक एकता बलियो बनाउन आवश्यक रहेका बताउँदै यसो गरिएको खण्डमा कांग्रेसले ७५३ वटै स्थानीय तहमा जित हासिल गर्ने अवस्था रहेको बताएका हुन् ।
राजनीति गर्दा पार्टीमा हारजित हुनु स्वभाविक भएको उल्लेख गर्दै उनले यसलाई आफूले सामान्य रुपमा लिएको बताए । उनले भने, “मैले त महाधिवेशनको तिक्तता त्यागी सकें, हामी एकतावद्ध भए हामीलाई कुनै पनि शक्तिले हराउन सक्दैन । ”
