नेपाली कांगेसका केन्द्रीय सदस्य तथा पूर्वमन्त्री मोहनबहादुर बस्नेतले आगामी निर्वाचनमा जनताको सुख दुःखमा साथ दिने नेपाली कांग्रेसलाई विजयी गराउन आग्रह गरेका छन् ।

आज (मंगलबार) बलेफी गाउँपालिकाको लामोसाँगु बजारमा स्वास्थ्य सामग्री वितरण कार्यक्रमलाई सम्बोधन गर्दै उनले कोरोना महामारीले जनता आक्रान्त भएको बेला आफू बिरामी हुँदासमेत रातदिन खटिरहेको बताए ।

उनले सुनकोशी गाउँपालिका, बलेफी गाउँपालिका, जुगल गाउँपालिका तथा चौतारा साँगाचोकगढी नगरपालिकाको केही वडामा रहेका जनसंख्या बराबर लगभग १ लाख मास्क, दसौं हजार सिटामोल तथा अन्य केही स्वास्थ्य सामग्री वितरण गरेका थिए । बस्नेतले भने, ‘म गोडामा लागेको चोटका कारण अप्रेसन गरेर यस्तो अवस्थामा भएको तपाइहरु सबैले देख्नुभएकै छ तथापि मेरो ब्यक्तिगत चोटभन्दा यहाँका लाखौं जनताको स्वास्थ्य महत्वपूर्ण कुरा हो, यस्तो आपदको बखतमा सहयोग गर्नु मानवीय कर्म त हुँदै हो कांग्रेस सदैव जनताकै पक्षमा रहेको प्रमाणित गर्नु पनि हो ।‘

कार्यक्रममा विभिन्न गाउँपालिकाबाट नेकपा एमाले र माओवादी केन्द्र परित्याग गरेर ७० जनाभन्दा बढी कांग्रेस प्रवेश गरेका थिए । कार्यक्रमको सभापतित्व देवेन्द्र बहादुर खत्रीले गरेका थिए भने महाधिवेशन प्रतिनिधिहरु विष्णुविक्रम थापा, डा. प्रेमध्वज लामा, युधिर पौडेल, जंगबहादुर तामा«ङ तथा राम तामाङ लगायतका नेताहरुको उपस्थिति रहेको थियो । नेपाली कांग्रेसले जिल्लाभर यस प्रकारका कार्यक्रम गर्ने तयारी गरेको युवा नेता तथा महाधिवेशन प्रतिनिधि युधिर पौडेलले जानाकारी दिए ।