काठमाडौं । नेपाली कांग्रेसका सभापति गगन थापाले आगामी पाँच वर्ष सरकारले जनभावनाअनुसार काम गर्नुपर्नेमा जोड दिएका छन् ।
आइतबार मतदाता भेटघाट कार्यक्रममा बोल्दै सभापति थापाले आगामी पाँच वर्ष सरकारले जनभावनाअनुसार, काम गर्नुपर्ने बताए। ‘अब सिंहदरबार पनि जल्नुहुँदैन, गोली पनि चल्नु हुँदैन,’ थापाले भने, ‘हामीले कर्तव्यबोध गरेर काम गर्नुपर्छ।’
उनले कुशासनबाट जनता आजित भएको जिकिर गरे। ‘सुशासन कायम गर्नुपर्छ। जनता कुशासनले आजित भएका छन्,’ उनले भने।
आगामी पाँच वर्ष सुधारका धेरै काम गर्नुपर्ने उनको भनाइ थियो। ‘युवालाई रोजगारी चाहिएको छ, स्वास्थ्य र शिक्षा जस्ता आधारभूत विषयमा काम गर्नुपर्नेछ,’ थापाले भने, ‘त्यसैले देश सम्हाल्न राष्ट्रिय दलले कर्तव्य बोध गरेर काम गर्नुपर्ने हुन्छ।’
आगामी पाँच वर्ष गर्ने कामको सूची बनाइसकेको बताउँदै जनतालाई परिणाम दिनुपर्ने समय आएको उनको भनाइ थियो। अब आनाकानी गर्ने छूट नभएको उनले बताए।
