काठमाडौं। नेकपा (एमाले) का नेता घनश्याम भुसालले १० बुँदे कार्यान्वन नभएको भन्दै त्यसको कार्यान्वयनमा जोड दिएका छन् । एमाले अध्यक्ष केपी शर्मा ओलीलाई पत्र लेख्दै भुसालले जे भनेर १० बुँदे गरिएको थियो, त्यसै गरी लागू गर्न पनि आग्रह गरेका छन् ।

‘हाम्रोजस्तो जिम्मेवार इतिहास भएको पार्टीको सांस्कृतिक आनुवंशिकीमा विकृति उत्पन्न भयो भने त्यसले पिँढी दरपिँढीसम्म आन्दोलनलाई प्रभाव पार्छ,’ कोरानाका कारण आइसोलेसनमा बसेका भुसालले लेखेका छन्, ‘तसर्थ कमरेड अध्यक्षसँग मेरो अनुरोध के छ भने दशबुँदे जे भनेर गरिएको थियो त्यसैगरी लागू गरियोस् ।’

भुसालले हालै सम्पन्न विधान महाधिवेशन जसरी हुनुपथ्र्यो त्यसरी नभएको पनि टिप्पणी गरेका छन् । ‘मुख्यतः पार्टीका नीति तथा सिद्धान्त र विधानमाथि पार्टीव्यापी र प्रतिनिधिहरुका बीचमा जुन गहिराइमा छलफल हुनुपर्थ्यो, त्यो हुन सकेन,’ उनको उनको भनाइ छ, ‘दोस्रो, महाधिवेशनको आयोजना जे जसरी भयो त्यस सम्पूर्ण प्रक्रियामा पार्टीको संस्थागत प्रक्रियाको घोर अवमूल्यन भयो ।’