काठमाडौं । कोरोनाको कारण देखाउँदै चीनले विगत डेढ महिनादेखि बन्द रहेको तातोपानी र रसुवा नाका चीनको राष्ट्रिय जनकंग्रेस, स्थायी समितिका अध्यक्ष ली चान्सुको चारदिने नेपाल भ्रमणको अन्तिम दिन बिहीबारबाट खुलाएको छ ।
नाका खुलेसँगै रसुवाबाट बिहीबार बिहानै सातवटा ठूला कन्टेनर सामान र तातोपानी नाकाबाट दुई कन्टेनर सामान भित्रिएको भन्सार विभाग, रसुवाका सूचना अधिकारी पुण्यविक्रम खड्काले बताए।
यसअघि रसुवा नाकाबाट दैनिक १४ वटा ठूला कन्टेनर सामान आउने र यो नाकाबाट अन्य सामानभन्दा बढी फलफूल भित्रिने गरेको छ। चारदिने नेपाल बसाइका क्रममा भएको उच्चस्तरीय भेटवार्तामा नेपालका तर्फबाट दशैतिहारजस्ता चाडपर्वको मुखमा यी दुई नाका तत्काल खोलिनुपर्नेमा जोड दिइएको थियो।
भेटमा राजनीतिक दलका शीर्ष नेताले लीलाई नाकाखुलाउने विषयमा विशेष आग्रह गरेका थिए। लीले बुधबार राष्ट्रपति विद्यादेवी भण्डारीसँगको शिष्टाचार भेटमा तातोपानी र रसुवागढी नाका तत्काल बोल्न चीन तयार रहेको बताएका थिए ।
