काठमाडौं । गत विहीबार राति सिन्धुपाल्चोकको बाह्रबिसे नगरपालिका-६ बोर्डरल्यान्डमा बा. २० च २१८५ नम्बरको बोलेरो दुर्घटनामा बेपत्ता एक महिलाको शव भेटिएको छ ।

सशस्त्र प्रहरी बल लामोसाँगु गुल्मका इन्चार्ज सशस्त्र प्रहरी नायव उपरीक्षक बिजय चौधरीले आज दिउँसो अन्दाजी १ बजेको समयमा त्रिपुरासुन्दरी गाउँपालिका-६ जुरे पहिरो नजिकै सुनकोशी नदी किनारको ढुंगाको कापमा शव फेला परेको जानकारी दिए ।

चौधरीका अनुसार सशस्त्र प्रहरीले नदी किनारमा खोजी गर्दा बेपत्ता सुन्तली तामाङको शव फेला परेको हो। शवलाई उनका ससुरा धनबहादुर तामाङले सनाखत गरेलगत्तै इलाका प्रहरी कार्यालय बाह्रबिसेलाई खबर गरेर पोष्टमार्टमका लागि बाह्रबिसे नगर अस्पताल पठाइएको छ । बोलेरो चालक सानु शेर्पा भने अझै फेला परेका छैनन्।

सुरक्षाकर्मीको टोलीले घटनालगत्तै गाडी र त्यसमा सवार यात्रुको खोजी गरे पनि भोटेकोशी नदीमा बाढी आएको कारण क्रेनको सहायताले करिब ७ घण्टापछि मात्रै  गाडी  निकालिएको थियो ।